జలవనరుల శాఖకు రూ. 397 కోట్ల నిధులు. నామినేషన్ పై రూ. 10 లక్షల లోపు పనులు. -మంత్రి నిమ్మల వెల్లడి.

పాలకొల్లు: మే,3(తెలుగు న్యూస్ పవర్. కామ్) రాష్ట్ర జలవనరుల శాఖకు రూ.397 కోట్ల నిధులు మంజూరైనట్టు రాష్ట్ర జనవరిలో శాఖ మాత్యులు, పాలకొల్లు శాసనసభ్యులు నిమ్మల రామానాయుడు ఆదివారం వెల్లడించారు. జల వనరుల శాఖ తరపున ముఖ్యమంత్రి కి ఈ సందర్భంగా కృతజ్ఞతలు తెలియజేశారు. రాష్ట్రంలో చివరి ఎకరం వరకు నీటి సరఫరా జరగాలని లక్ష్యంతో, రైతులకు, వ్యవసాయానికి ప్రాధాన్యత ఇస్తూ, ఇప్పటివరకు సుమారు రూ.1100 కోట్ల నిధులు కూటమి ప్రభుత్వం కేటాయించిందన్నారు. అత్యవసరంగా అవసరమైన, కాలువలు,చెరువులు, రిజర్వాయర్లు, బావుల కోసం ఈ నిధులు కేటాయించినట్టు తెలిపారు. వేలకోట్ల సాగునీటి ప్రాజెక్టులు నిర్వహణ లేక, కనీసం కందెన వేసే పరిస్థితి కూడా లేక గత ప్రభుత్వంలో గేట్లు కొట్టుకుపోయి అపార నష్టం జరిగిందని గుర్తు చేశారు. వచ్చే సార్వా నాటికి ఈ పనులు పూర్తయ్యేలా, ముఖ్య ఇంజనీర్ దగ్గర నుంచి క్షేత్రస్థాయి సిబ్బంది వరకు మే నెల అంతా కృషి చేయాలని మంత్రి సూచించారు. పనులన్నీ పారదర్శకంగా నీటి సంఘాలు, అధికారుల పర్యవేక్షణలో జరగాలన్నారు. గత ప్రభుత్వం 5 ఏళ్ళలో కాలువల నుంచి తట్టమట్టి పూడిక కూడా తీయలేదని ఆరోపించారు. కాలువల్లో గుర్రపు డెక్క, తూడు, కిక్కిస పెరిగి కాలువల మూసుకు పోయిన తొలగించ లేదన్నారు. ప్రస్తుతం విడుదలైన ఓ అండ్ ఎం నిధులు అత్యవసర పనులకు ఖర్చు పెడతామన్నారు. అందువల్ల జలధార, జలహారతి కార్యక్రమంలో భాగంగా, భూగర్భ జలాలు కూడా పెరిగే అవకాశం ఉందని తెలిపారు.